Cofnodion

Gofynnodd y Cynghorydd Cleverly:

Pryd wnaeth y Cabinet benderfynu a chytuno i ddiddymu’r gwasanaeth ieuenctid a symud yr holl weithwyr ieuenctid i Gymunedau Cryf fel gweithwyr hybiau cymunedol?

Y llynedd, rhoddwyd £350,000 ychwanegol i bob gwasanaeth ieuenctid yng Nghymru.  Y rheswm dros hyn oedd i roi mwy o gymorth i bobl ifanc â phroblemau iechyd meddwl nad ydynt yn glinigol, pobl ifanc nad ydynt mewn addysg, hyfforddiant neu gyflogaeth a’r rheiny sy’n ddigartref.

Ledled de Cymru, mae gwasanaethau ieuenctid wedi recriwtio timau newydd i greu’r project newydd hwn; mae un yng Nghaerffili gyda thîm o 5. 

Pam nad oes unrhyw beth fel hyn yng Nghasnewydd?

Yn anffodus, fel gyda llawer o arian y bwriedir ei neilltuo ar gyfer gwaith ieuenctid, nid yw’n cael ei glustnodi.   Mae llawer o’n gwasanaethau a chlybiau ieuenctid bellach wedi cau yng Nghasnewydd oherwydd toriadau cyllidol ac mae ein pobl ifanc a’n cymunedau’n wynebu canlyniadau difrifol.

Nid clybiau ieuenctid a gwaith ieuenctid yw’r unig ateb, ond maen nhw’n cyfrannu’n fawr fel lleoedd y gall pobl ifanc deimlo’n ddiogel a lle gallant ddod o hyd i rywun a fydd yn gwrando ar eu pryderon a’u helpu i fynd i’r afael â nhw.

Fel gweithwyr ieuenctid, rydym yn delio gydag addysg gymdeithasol gyda phobl ifanc, gan eu helpu wrth iddynt ddod yn oedolion.

Dywedodd y Cynghorydd Mayer:

Nid yw’r Gwasanaeth Ieuenctid wedi’i ddileu; mae’n cael ei ddarparu ym mhob rhan o’r ddinas yn rhan o’r model Hyb Cymdogaethau.  Mae pob swydd yn y gwasanaeth ieuenctid yn parhau i gyflawni Gwaith Ieuenctid ym mhob rhan o’r ddinas.

Cafodd Casnewydd £310,000 ychwanegol yn 19/20 ar gyfer iechyd meddwl a llesiant yn ogystal â digartrefedd ieuenctid.  Mae gwaith yn gysylltiedig â phobl ifanc nad ydynt mewn addysg, hyfforddiant neu gyflogaeth yn parhau i gael ei wneud gan ddefnyddio ffynonellau arian cyngor ac allanol.

Mae 9 swydd newydd wedi’u creu yng Nghasnewydd i gefnogi iechyd meddwl/llesiant, digartrefedd a gwaith ieuenctid, yn unol â’r grant a ddyfarnwyd.

Hefyd, mae’r awdurdod wedi talu am wasanaethau Seicolegydd Clinigol Cymunedol, Seicolegydd Addysg ac yn ariannu’n rhannol swydd Swyddog Datblygu Tai Pobl.

Mae’r holl arian y bwriedir ei roi i’r gwasanaethau ieuenctid wedi’i glustnodi ac yn cael ei wario yn y maes hwnnw.

Mae’r Gwasanaeth Ieuenctid yn cynnig ystod eang o raglenni ledled yr hybiau i bobl ifanc yn amrywio o gymorth addysgol, hyfforddiant a chyflogaeth, i wasanaethau sy’n ymwneud â hamdden ac agweddau cymdeithasol. Hefyd cynigir gwasanaeth cymorth cofleidiol gyda gofal bugeiliol i bobl ifanc, sy’n ceisio mynd i’r afael â’u hanghenion mewn modd cyfannol.