Agenda item

Cyflwynodd yr Arweinydd yr adroddiad hwn, gan fanylu ar weithgareddau rheoli’r trysorlys y Cyngor ar gyfer 2019/20.  Roedd yn adroddiad ôl-syllol yn cadarnhau bod yr holl fenthyciadau a buddsoddiadau yr ymgymerwyd â nhw yn ystod y flwyddyn ariannol yn ddisgwyliedig ac yn unol â’r cyfyngiadau y cytunwyd arnynt a osodwyd gan y Cyngor llawn.  Hefyd cadarnhaodd fod Dangosyddion Darbodus 2019/20 ar gyfer rheoli’r trysorlys wedi cael eu bodloni yn unol â’r rhai a bennwyd gan y Cyngor.

Strategaeth bresennol y Cyngor oedd ariannu gwariant cyfalaf drwy leihau buddsoddiadau (ein benthyca mewnol) yn hytrach nag ymgymryd â benthyca newydd lle y gall, h.y. gwnaethom ohirio cymryd benthyca hirdymor newydd ac ariannu gwariant cyfalaf o adnoddau arian parod y Cyngor ei hun - yn bennaf arian wrth gefn.  Trwy ddefnyddio’r strategaeth gallai’r Cyngor hefyd leihau taliadau arian parod ar adeg pan fo risg gwrthbleidiol yn parhau’n gymharol uchel, yn enwedig gyda’r goblygiadau economaidd presennol yn ystod Covid-19.

Roedd lefel y benthyca mewnol tua £87 miliwn, a thrwy ddefnyddio’r strategaeth hon amcangyfrifwyd bod y Cyngor wedi arbed tua £2.6 miliwn mewn costau refeniw yn seiliedig ar gyfraddau llog cyfredol.  Ni ellid cynnal y strategaeth hon gan y byddai’r cyngor yn lleihau ei gronfeydd wrth gefn dros y tymor canolig, er enghraifft, cronfeydd PFI wrth gefn, felly byddai angen i’r cyngor ‘gyfnewid’ y benthyca mewnol am fenthyca go iawn yn y dyfodol.  

Roedd lefel y benthyca allanol a gynhaliwyd gan y Cyngor ar 31 Mawrth 2020 yn sylweddol o hyd sef £166 miliwn, byddai hyn yn cynyddu yn y blynyddoedd i ddod wrth i’n gallu benthyca’n fewnol leihau fel y defnyddiwyd y cronfeydd wrth gefn fel y nodir uchod. 

O’r £166 miliwn hwn, roedd yn bwysig nodi yr ymgymerwyd â £15 miliwn ychwanegol o fenthyca er mwyn galluogi’r Cyngor i fod ar y blaen wrth gefnogi’r ymateb i Covid-19 a gweinyddu grantiau busnes i fusnesau yng Nghasnewydd, cyn i’r cyllid gael ei dderbyn gan Lywodraeth Cymru.

Y balans buddsoddi ar 31 Mawrth 2020 oedd £12.5 miliwn, gan fynd â’r benthyca net i £153.8m, roedd hyn yn gynnydd o £17.2 miliwn ers y flwyddyn flaenorol.  Nodwyd y byddai’r Cyngor yn cadw balans buddsoddi gofynnol er mwyn bodloni gofynion cael eu hystyried fel corff proffesiynol at ddibenion cydymffurfio.

Hefyd manylodd yr adroddiad ar fuddsoddiadau nad ydynt yn rhan o’r trysorlys fel sy’n ofynnol gan Lywodraeth Cymru, gan gynnwys buddsoddiadau mewn eiddo a berchnogir yn uniongyrchol, fel unedau masnachol a diwydiannol, benthyciadau i fusnesau a landlordiaid a chyfranddaliadau lleol mewn is-gwmnïau; yn ein hachos ni, Trafnidiaeth Casnewydd.  Cyfanswm gwerth y buddsoddiadau hyn ar 31 Mawrth 2020 oedd £14.5 miliwn.

Cymeradwyodd y Cabinet yr adroddiad ym mis Gorffennaf felly cyflwynodd yr Arweinydd yr adroddiad i’r Cyngor llawn nawr i’w gymeradwyo.

Diolchodd y Cynghorydd M Rahman i’r Arweinydd am gymryd y camau cyflym a rhyddhau’r arian ar gyfer busnesau, a achubodd teuluoedd a busnesau oedd yn methu.

Penderfynwyd:

I’r Cyngor nodi a chymeradwyo’r adroddiad ar weithgareddau rheoli’r trysorlys ar gyfer 2019/20, a oedd yn unol â’r Strategaeth Rheoli Trysorlys ar gyfer 2019/20 y cytunwyd arni.